Friday December 02, 2016
Latest Updates

റവന്യൂവിന്റെ അന്വേഷണ ലിസ്റ്റില്‍ മലയാളികളും:നിജസ്ഥിതി അന്വേഷിച്ചു പരിശോധന തുടങ്ങി 

റവന്യൂവിന്റെ അന്വേഷണ ലിസ്റ്റില്‍ മലയാളികളും:നിജസ്ഥിതി അന്വേഷിച്ചു പരിശോധന തുടങ്ങി 

ഡബ്ലിന്‍:ബാങ്ക് അക്കൌണ്ടുകളില്‍ സംശയകരമായ ഇടപാടുകള്‍ നടത്തുന്നവര്‍ക്കെതിരെ റവന്യൂ കര്‍ശന നടപടിയെടുക്കുന്നതായി റിപ്പോര്‍ട്ടുകള്‍.മലയാളികള്‍ ഉള്‍പ്പെടെ നൂറുകണക്കിന് പേര്‍ക്കെതിരെ ബാങ്ക് അക്കൌണ്ടുകളില്‍ അനധികൃതമായി പണം കണ്ടെത്തിയതിനെ തുടര്‍ന്ന് അയര്‍ലണ്ടില്‍ നടപടികള്‍ ആരംഭിച്ചു.

ഏതാനം മലയാളികളുടെ വീടുകളിലും സ്ഥാപനങ്ങളിലും ഇതേ തുടര്‍ന്ന് കഴിഞ്ഞ ദിവസങ്ങളില്‍ റവന്യൂ പരിശോധന നടത്തി നിജസ്ഥിതികള്‍ ചോദിച്ചറിഞ്ഞു.അയ്യായിരത്തോളം ബാങ്ക് അക്കൌണ്ട് ഉടമകള്‍ക്കെതിരെ അയര്‍ലണ്ടില്‍ ആകെ റവന്യൂ നടത്തുന്ന പരിശോധനയുടെ ഭാഗമാണ് ഇതെന്ന് അധികൃതര്‍ വെളിപ്പെടുത്തി.

രാജ്യത്ത് രജിസ്റ്റര്‍ ചെയ്തതും അല്ലാത്തതുമായ കമ്പനികളുടെയും സ്ഥാപനങ്ങളുടെയും വ്യക്തികളുടെയും അക്കൌണ്ടുകളെ പരിശോധനയ്ക്ക് വിധേയമാക്കുന്നുണ്ട്.ഒരു ലക്ഷമോ അതിലധികമോ യൂറോയുടെ ഇടപാട് ബാങ്ക് അക്കൌണ്ടില്‍ വന്നാല്‍ ടാക്‌സ് അടച്ചാലും റവന്യൂ ആവശ്യപ്പെട്ടാല്‍ അത് എവിടെ നിന്നും വന്നു എന്ന് വ്യക്തമാക്കേണ്ട ഉത്തരവാദിത്വം അക്കൌണ്ട് ഉടമയ്ക്കാണ്.

ബിസിനസ് ആവശ്യങ്ങള്‍ക്കും മറ്റുമായി മറ്റുള്ളവരുടെ അയര്‍ലണ്ടിലെ അക്കൌണ്ടില്‍ നിന്നും യൂറോ ട്രാന്‍സ്ഫര്‍ ചെയ്ത ശേഷം കേരളത്തില്‍ രൂപയായി തിരിച്ചു കൊടുത്തവരും അന്വേഷണത്തെ നേരിടേണ്ടി വരും.കേരളത്തില്‍ നിന്നും ഭവന വായ്പ്പയ്ക്കായി ഡിപ്പോസിറ്റ് നല്‍കാനായി ട്രാന്‍സ്ഫര്‍ ചെയ്യുന്നവര്‍,ചിട്ടി പോലെയുള്ള സാമ്പത്തിക മാര്‍ഗങ്ങളിലൂടെ അക്കൗണ്ടില്‍ അനധികൃതമായി പണം സ്ഥിരമായി സംഭരിക്കുന്നവര്‍ തുടങ്ങിയവര്‍ അന്വേഷണപരിധിയില്‍ ഉള്‍പ്പെടുന്നുണ്ട്.

വരവില്‍ കവിഞ്ഞ പണം ബാങ്കില്‍ കൂടി ട്രാന്‍സ്ഫര്‍ ചെയ്യുന്നവര്‍ എല്ലാവരും അന്വേഷണ പരിധിയില്‍ വരുന്നുണ്ടെങ്കിലും സംശയകരമായ ഇടപാടുകള്‍ മാത്രമേ പരിശോധനയ്ക്ക് വിധേയമാക്കുന്നുള്ളൂവെന്ന് റവന്യൂ അധികൃതര്‍ വെളിപ്പെടുത്തി.നിയമാനുസൃതമായ മാര്‍ഗങ്ങളില്‍ അല്ലാതെ പണം കൈകാര്യം ചെയ്യുന്നവര്‍ക്കെതിരെ നടപടികള്‍ ഉണ്ടാവുമെന്നും,അവരെ റവന്യൂവിന്റെ കരിമ്പട്ടികയില്‍ പെടുത്തുമെന്നും റവന്യൂ മുന്നറിയിപ്പ് നല്‍കി.എന്നാല്‍ ന്യായമായ വിശദീകരണം നല്‍കുന്നവര്‍ക്ക് പിഴയൊടുക്കി കര്‍ശന ശിക്ഷകളില്‍ നിന്നൊഴിവാകാമെന്നും റവന്യൂ അധികൃതര്‍ പറഞ്ഞു .

Scroll To Top