Monday December 05, 2016
Latest Updates

ഐറിഷ് യുവതികളെ പീഡനത്തിനിരയാക്കിയ മലയാളിയായ ഇടതു പക്ഷ നേതാവിന് ബ്രിട്ടണില്‍ 30 വര്‍ഷത്തെ ജയില്‍ ശിക്ഷ ലഭിച്ചേക്കും

ഐറിഷ് യുവതികളെ പീഡനത്തിനിരയാക്കിയ മലയാളിയായ ഇടതു പക്ഷ നേതാവിന് ബ്രിട്ടണില്‍ 30 വര്‍ഷത്തെ ജയില്‍ ശിക്ഷ ലഭിച്ചേക്കും

ലണ്ടന്‍ :രണ്ടു ഐറിഷ് യുവതികളെ ലൈംഗികാക്രണത്തിനു ഇരയാക്കിയ സംഭവത്തിലും സ്വന്തം മകളെ 30 വര്‍ഷം തടവിലാക്കിയ കേസിലും മലയാളിയായ ഇടതുപക്ഷ നേതാവ് കുറ്റക്കാരനെന്ന് കോടതി കണ്ടെത്തി. സഖാവ് ബാല എന്നറിയപ്പെടുന്ന മാവോയിസ്റ്റ് നേതാവ് അരവിന്ദന്‍ ബാലകൃഷ്ണന്‍ (75) നെതിരെയാണ് 30 വര്‍ഷത്തോളം സ്ത്രീകള്‍ക്കെതിരെ മൃഗീയമായ രീതിയില്‍ പെരുമാറിയതിന് ബ്രിട്ടനില്‍ കുറ്റക്കാരനെന്ന് കോടതി കണ്ടെത്തിയത്.30 വര്‍ഷം വരെ തടവ് ശിക്ഷ ലഭിക്കാവുന്ന കുറ്റമാണിതെന്ന് നിയമവൃത്തങ്ങള്‍ പറയുന്നു.തിങ്കളാഴ്ച്ച കോടതി അന്തിമ വിധി പറയും.

തനിക്ക് ദൈവതുല്യമായ ശക്തിയുണ്ടെന്നാണ് അനുയായികളെ വിശ്വസിപ്പിച്ചിരുന്നത്. വീടിനു പുറത്തിറങ്ങിയാല്‍ മിന്നലേറ്റ് മരിക്കുമെന്നും ഭീഷണിപ്പെടുത്തിയിരുന്നതായി മകള്‍ വെളിപ്പെടുത്തി. രണ്ട് വര്‍ഷം മുമ്പ് രക്ഷപ്പെട്ടില്ലായിരുന്നെങ്കില്‍ താന്‍ ആത്മഹത്യ ചെയ്യുമായിരുന്നു. വര്‍ഷങ്ങളോളം താനാണ് ദൈവമെന്നായിരുന്നു ബാലകൃഷ്ണന്‍ പറഞ്ഞത്. തനിക്കെതിരെ പറഞ്ഞാല്‍ ജാക്കി എന്നയാള്‍ തന്നെ വധിക്കുമെന്ന് ഭീഷണിപ്പെടുത്തിയിരുന്നതായും അവര്‍ പറഞ്ഞു. ‘ഫ്രാന്‍’ എന്ന അപരനാമത്തിലാണ് ഇവര്‍ മാധ്യമങ്ങളോട് കാര്യങ്ങള്‍ വിശദീകരിച്ചത്.

ദക്ഷിണ ലണ്ടനില്‍ 1970കളില്‍ പ്രവര്‍ത്തിച്ചിരുന്ന വര്‍ക്കേഴ്‌സ് ലീഗ് എന്ന ഗ്രൂപ്പിലായിരുന്നു ബാലകൃഷ്ണന്‍ പ്രവര്‍ത്തിച്ചത്.കോമ്രേഡ് ബാല എന്നായിരുന്നു അവിടുത്തെ മാവോയിസ്റ്റ് പാര്‍ട്ടി വൃത്തങ്ങളില്‍ ബാല അറിയപ്പെട്ടിരുന്നത്.കൊല്ലം സ്വദേശിയായ ബാലകൃഷ്ണന്‍ 1963ലാണ് സിംഗപ്പൂരില്‍ നിന്നും ലണ്ടനില്‍ എത്തിയത്. സായുധ പോരാട്ടത്തിനുള്ള നീക്കങ്ങള്‍ നടത്തിയതിനെ തുടര്‍ന്ന് 1973ല്‍ ഇംഗ്ലണ്ട് കമ്യൂണിസ്റ്റ് പാര്‍ട്ടിയില്‍ നിന്ന് പുറത്താക്കപ്പെട്ടു. പിന്നീടാണ് രഹസ്യമായി പ്രവര്‍ത്തിക്കാന്‍ ആരംഭിച്ചത്.

തന്റെ അനുയായിയില്‍ അരവിന്ദനു പിറന്ന കുഞ്ഞിനെ ലണ്ടനിലെ വീട്ടില്‍ 30 വര്‍ഷമാണ് തടവിലാക്കിയത്. നഴ്‌സറി പദ്യങ്ങള്‍ ചൊല്ലാനോ, സ്‌കുളില്‍ പോകാനോ അനുവദിച്ചിരുന്നില്ല. ദേഹോപദ്രവം പതിവായിരുന്നു. കൂട്ടില്‍ അടച്ച പക്ഷിയെ പോലെയുള്ള താനൊരു നിഴല്‍ മനുഷ്യനാണ് എന്നാണ് ഈ കുട്ടി സ്വയം വിശേഷിപ്പിച്ചത്. തന്റെ പിതാവിനെതിരെയുള്ള വിധി കേട്ടതില്‍ താന്‍ തൃപ്തനാണെന്നാണ് മകള്‍ പറഞ്ഞത്. തനിക്ക് നീതി ലഭിക്കുമെന്ന് ഉറപ്പായിരുന്നെന്നും അവര്‍ കൂട്ടിച്ചേര്‍ത്തു.

2013ല്‍ 30 വയസുള്ളപ്പോഴാണ് തടവിലായിരുന്ന ഈ കുട്ടിയെ ജീവകാരുണ്യ സംഘടന രക്ഷപ്പെടുത്തിയത്. 2005ല്‍ തടവില്‍ നിന്നും രക്ഷപ്പെടാനുള്ള ശ്രമം നടത്തിയെങ്കിലും പോലീസ് തിരികെ വീട്ടില്‍ എത്തിക്കുകയായിരുന്നു.വടക്കന്‍ ലണ്ടനിലെ എന്‍ഫീല്‍ഡിലുള്ള ബാലകൃഷ്ണനെതിരെ ആറ് ലൈംഗീകാക്രമണ കേസും നാലു ബലാത്സംഗ കേസുമുണ്ട്. കൂടാതെ 16 വയസില്‍ താഴെയുള്ള കുട്ടിയെ ഉപദ്രവിച്ച സംഭവത്തിലും ഇയാള്‍ക്കെതിരെ കേസുണ്ട്.

Scroll To Top